सांस्कृतिक-सामाजिक-शैक्षणिक क्षेत्रात आपल्या सृजनशील आणि मौलिक कार्याची लक्षणीय भर घालून, महाराष्ट्राचेच नव्हे, तर देशाचेही सांस्कृतिक जीवन समृद्ध करणाऱ्या व्यक्तीस, समाजाच्या मनातील कृतज्ञतेची खूण म्हणून ‘चतुरंग प्रतिष्ठान’च्या वतीने प्रतिवर्षी ‘जीवनगौरव पुरस्कारा’ने सन्मानित करण्यात येते. यंदाच्या सांस्कृतिक क्षेत्रीय जीवनगौरव पुरस्कारासाठी पं. सुरेशराव तळवलकर यांची निवड करण्यात आली आहे. डॉ. विनय सहस्रबुद्धे यांच्या अध्यक्षतेखाली सर्वश्री सुधीर जोगळेकर, दीपक करंजीकर, मनोज जोशी, सारंग दर्शने, नविन काळे आणि सौ. मंजिरी मराठे या मान्यवरांच्या निवड समितीकडून एकमताने ही निवड करण्यात आली आहे. पं. सुरेशराव तळवलकर यांनी सातत्याने गेली अनेक वर्षे आपल्या सकस सर्जनशीलतेच्या, अव्वल दर्जाच्या बुद्धिमंत प्रतिभेने, तालवाद्य कला प्रकारात बहुमोल भर घातली आहे. वादन कलेतील, खासकरून तबला वादनातील प्राविण्य हे केवळ ‘स्वांत सुखाय’ मर्यादित न ठेवता गुरु-शिष्य परंपरेचे पाईक होऊन, आपल्या गुरुंकडून मिळालेला वारसा त्यांनी हजारो शिष्यांच्या हाती सुपूर्द केला आहे आणि आजही करीत आहेत. अत्यंत कष्टपूर्वक तालवाद्यांच्या सर्व प्रकारांना आत्मसात करून संशोधनपूर्ण अभ्यासाने त्यात भर घालून अनेकानेक नवोन्मेषी प्रयोगांनी समाजाच्या सांस्कृतिक संचितात लाभलेले पं. सुरेश तळवलकर यांचे हे योगदान म्हणूनच सर्व कलासक्त, संवेदनशील, अभ्यासकांसाठी आणि रसिकांसाठीही अभिवादनास पात्र आहे.